Зумыто уж 2.0

Кылем гудырикошконлэн пумаз выльысен улӟиз Россиын но Украинаын тужгес но яратоно «Вконтакте» нимо мер вотэслэсь интерфейссэ удмурт кылэ берыктон уж. Табере «Вконтакте»-лэн эшшо одӥг нимыз луоз на – «Контактын». Али та вотэслэсь интерфейссэ удмурт кылэ сяна, бигере, поре но мукет кылъёсы берыкто. Та интерфейсэз берыктонэз мылкыдчиос 2008-тӥ арын гужемпал мытӥзы. Со берыктонлэн нырысетӥ тулкымез вал. Техник ласянь умоятэмъёслы тау каремен луонлык кылдӥз кыкетӥ берыктон тулкымын ужез ӝогомытыны. Табере котькуд адямилэн, кинлэн ӧтёнэз вань, ужрадэ пыриськемез луэ. Берыктон понна табере нокытчы но нимаз пыроно ӧвӧл, тупатонъёсты пыртыны луэ меӵак «Контактын» пукыку. Та ужрад тулкымъёсты ӵошатоно ке, вераны кулэ, кыкетӥ берыктонын уж шалтыргес азинске. «Контактынэз» берыктонлэн кивалтӥсез Роман Романов, Удмуртлык нимо «Контактын» туркымлэн кылдытӥсез, удмурт кылын вотэспроектъёслэн валтӥсез, таизлэсь ужрадлэсь ӝоглыксэ тазьы валэктэ:
«Берыктонлэн нырысетӥ тулкымаз «Контактынлэн» ас эрказ берыктон интерфейсэз ӧй вал на. Мер вотэслэн администраторъёсыз «куяло вал» кыл пакетъёсыз текстъёсын (отын берыктон кылъёсыз сяна луэ на вал программа кодэз но, кудзэ туж капчи сӧрыны), нош берыктӥсьёс котькудӥз со текстэз ас учкемзыя берыкто вал. Вакчияк вераса, со «Контактынлэн» администраторъёсызлы но, берыктӥсьёслы но туж акылес потӥз, дыр. Соин ик, вылды, та ужрад «Контактынлэн» администрациеныз дугдытэмын вал, но берыктисьёслы юромо кылдытэм берыктон интерфейсэз возьманы ӵектэмын вал.
Берыктонлэн кыкетӥ тулкымез туж капчиен кошкиз. Кылдытэмын усто берыктон интерфейс. Берыктыны быгатэ котькуд пыриськись, солы берыктӥсьёс пӧлысь кин ке ӧтён келя ке, но берыктыны мылкыд карисьёс тросгес луозы шуыса, малпасько вал. Али таин выро Алексей Емельянов, Андрей Болтачев, Роман Романов, Артем Малых, Ольга Урасинова, Александр Егоров, Дмитрий Антонов но Лариса Широбокова. Чиданзы тросэзлэн уг тырмы, шӧдске. Вань сыӵеосыз, кудъёсыз ӧтён куро но чиптэм-чаптэм ышо. Оскисько, берыктӥсьёслэн лыдзы йылоз». Али соос ӧжыт кузя ке но, выремзы элькун нимкылъёсъя но шонер гожъяськонъя ӧрилен ужезлы укшагес ини.

Валамон ини, берыктонын шуг-секыт интыос но вань. Роман ӝожтӥське: «Удмурт кылын ӧвӧл юри кылдытэм нимкыллык, соин йырин трос шуг-секытъёс кылдыло (кылсярысь, валантэмгес, кызьы берыктоно «комментарий», «закладка», «сообщение» но мукет кылъёсыз). Со сяна, куд-огез «Контактынэз» берыктыны кутске аслыз удмурт раскладка пуктытэк но аффрикатаосты пуктылытэк — ӵ интые ч, ӟ интые з гожтэ но мукет. Та учыр возьматэ, удмурт калык удмурт раскладкалы дышемын ӧвӧл на шуыса».
Берыктонлэсь трендъёссэс пусъёно ке, берыктӥсьёс тыршо удмурт кыллэсь вань синошмесъёссэ, узырлыксэ но улосвыл пӧртэмлыкъёссэ уже кутыны. «Берыктонын ӟуч кылъёслэсь пегӟыны тыршиськом. Мед вордскоз выль кыл, но ӟуч кылъёсты кутон — умой амал ӧвӧл». Берыктон умой луыны кулэ, валэктэ Роман, малы ке шуоно удмурт интерфейсэз уже кутись удмуртъёслы со туала удмурт кыллэн возьматос но стандарт выллем луоз. Контактынэз уже кутыса, выль кылъёс но кылтэчетъёс пумен-пумен улонэ пычатскозы. «Контактын туж трос удмурт, кудӥз выль кылъёсты адӟыса вакчи дыр куспын тодманы кутскоз но пеляз поноз. Ымысь ыме, пельысь пеле — кылдыны кулэ туж ӟеч коммуникаци вӧлмет, кудӥз выль кылъёслэсь удмурт калык пӧлы пыӵамзэ ӝогомытоз».
Роман Романов маде берыктӥсьёс пӧлын юнмам инъетъёс но вань ини шуыса, бадӟым оскалтэм (опыт) люкамын (QIP, IT-кыллюкам) валлё программаослэн берыктонъёсысьтызы. «Отысь берыктэм кылъёсыз но амалъёсыз «Контактынэз» берыктыкумы но санэ басьтыны тыршиськом, — вера Роман. — Кылсярысь, малпамын ини тунсыко кылъёс (пыронним — «логин», лушкемкыл — «пароль» но мукет). Инфинитивын сылӥсь кылкаронъёсыз кутыку но тазьы гожтӥськом, кылсярысь «удалить» — ӵушоно, «сохранить» — утёно. Азьло тросэз берыктысалзы «ӵушыны» но «утьыны».
Куке кыллэн эсэпъёсыз удмурт кылъем школа пыр уг вӧлмытско, соку одӥгез тужгес но кулэ луись удмурт кыл нормаосты сётон инты — удмурт кылъем вотэс, тужгес но туала компьютеръёсын тыро но азинскем технологиё улонын. Соин ик берыктон ӵоже кылдытэм, шуом, техникаез валэктӥсь, выль нимкылъёс удмурт кыллэсь выль удысъёсын но югдуръёсын кутӥськыны быгатэмзэ юнмато, прецедент кылдыто. Туннэ нуналлы вотэс берыктонъёс – со сыӵе удыс, кудаз удмурт нимкыллыклэн азинтэмез программистъёсын но тодосчиосын сяна, огшоры вотэсэ пыриськисьёсын но кулэ каремын. Озьыен, та ужрад кирпазьге мифез, берыктон ужен тодосчиос гинэ вырыны кулэ шуыса.
Берыктон уж быдэстымтэ на, но уж шаплы мынэ. Вуоно удмурт кылын интерфейслэн емышъёсыз пумысен малпакуз, Рома Романов оскыса вуоное учкемзэ уг ваты: «”Контактын” 80 миллион пала адями пуке. Берыктонъёсын лыдметысь удмурт кылъем интерфейсэ чӧлскон потӥз ке, тросэз «удмурт» кыллэсь гожтэмзэ но тодманы кутскозы, нош со 80 миллион пӧлысь кӧняез ке одно ик «удмурт» гожтэмез синйылтоз, оло, вожъяськоз но. «Контактын» кадь тодмо но бадӟым проектъёсын одӥг но чӧлскон огшоры ӧвӧл. Соин ик малпасько, чӧлскон потӥз ке, со удмурт калыклы бадӟым дан луоз. Удмуртъёс но данъяськыса вералозы, «Контактынлэн» удмурт кыло интерфейсэз вань шуыса. Осетинъёс «Контактынэз» берыктыны кутскемзы бере раскладказылы кулэяськон 2 поллы, пе, будэм (http://ironau.ru/vkos.html). Туж умой луысал, асьмелэн но озьы пӧрмысал ке. «Контактынэз» удмурт кылэ берыктэмен компьютерен удмурт вырисьёсты визьнодалом но удмурт кыллэсь престижзэ ӝутом, бадӟым вамыш лэсьтом но пичиен-пичиен азьланьтом удмурт культуралэсь азинскемзэ, нош «бадӟым ужъёс пичи вамышъёсын лэсьтӥсько», — пусйиз IT-ӧнерчи.
Нимлыко интыосын шер кутӥськись ичи лыдъем кылъёс понна «Контактынлэн» берыктонэз — бадӟым но туж кулэ луись вамыш. Россиысь тужгес но яратоно мер вотэслэсь интерфейссэ берыктон сюрес усьтоз ичи лыдъем кылъёсын вераськись адямиослы ас кылзэс ӟуч но англи кылъёсын артэ одӥг радын уже кутыны. «Контактынэз» берыктон шараялоз кыллэсь луонлыкъёссэ но солэсь котькыӵе удысын уже кутӥськыны быгатэмзэ. Та вамыш пичи калыкъёслэн кылъёссы сюбег бусыын гинэ (семьяын но гурт удысын) уже кутымонэсь шуыса малпанэз вормыны юрртоз.
Артем Малых
Ольга Урасинова
оригинал статьи на Уралистике

Добавить комментарий

Ваш адрес email не будет опубликован. Обязательные поля помечены *

Этот сайт использует Akismet для борьбы со спамом. Узнайте, как обрабатываются ваши данные комментариев.