Сергей Максимов — КонтактЫн удмурт кылын

 

… луиз, – шуысалзы башкырт удмуртъёс, яке Мы это сделали – американ сямен -:).

Нырысь ик вань удмуртъёсты быдӟым вормонэн ӟечкыламе потэ. Малпасько асьмеос зэмзэ но данъяськыны быгатӥськом, угось кунысьтымы  ог 150-180 калык пӧлысь асьмеос осетинъёс, кабардин-черкесъёс, бигеръёс но ингушъёс бере 5-тӥосыз луимы.

Мар бордысен мон кутски та уж борды? Гужем пумын ӵош ужась юлтошелэсь адӟи, огаз вотэсбамын (сайтын) солэн анкетаез удмурт кылын шуыса. Озьыен, мыным со туж тунсыко потӥз. Ӝегатскытэк ВКонтактеын пусйиськи, но удмурт кылын анкетае но командаос мед луозы шуыса, нимысьтыз «тӧролы» вазиськоно на вылэм. Ӝоген анкетае удмуртомиз – туж тунсыко, мылкыд ик лӧптэ! Но соин валче ик тросэз командаос, кылъёс сюлмам уг бинисько вал: Мынам бамы, Мынам эшъёсы, Мынам гожтэтъёсы… — малы ке но туж секыт потэ вал… угось удмурт сямен чылкак бамы, эшъёсы,  гожтэтъёсы но тырме кадь. Воштӥ кылме финн кылэ – соослэн Ас бам, Ас эшъёс, Ас гожтэтъёс… Таосыд мукет сяменгес кариллям, уката ик берло дыре асъян итэтъёссы (посессивной суффкисъёссы) вераськон кылазы гинэ ӧвӧл, гожъяськон кылазы но куддыр уг кутӥсько ни.

Воштӥ кылэз казах кылэ (бигерлэсь учкеме потэ вал но, та кыл лыдметын ӧй на вал) – таосыд но быдӟым йӧскалык кылын малпаськонлэсь мозмытскыны быгатӥллямтэ. Соку турок кылэ потӥ – ӵапак озьы! – нокыӵе «мынамъёс» но анкетаям ӧз кыле. Озьыен, малпан кылдӥз, одно ик ВКонтактеез удмуртомытонэ пыриськыны кулэ шуыса.

Нырысь, зэм ик, шудон уж кадь гинэ потэ вал, бератаз уж шугомыны кутскиз. Кызьы валай, тросэзлэн пыриськисьёслэн сыӵе мылыкыдзы вал: ӟуч кылъёсты ваньзэ сямен одно ик берыктоно. Но газетын-журналын, ӟуч кыллэсь палэнскон понна, ӵемысь сое кык-куинь кылын суредмаса сёто ке, татын куронъёс мукетэсь. Озьыен, ачим нимкылъёс (терминъёс) малпаны кариськи. Но бератаз шӧдыны кутски, тросэз кылъёс, командаос уно пол выльысь но выльысь пумиськыло, нош куке но кылдытэм кылы йырысьтым потэмын ни – берыктэм комнадаос пӧлысь кема утчаса улоно. Тазьы дауртонтэм вылысь малпам кылъёсме кылсузьетэ (словнике) бичаны кутски, кудзэ кызьы ке ӟуч-удмурт, озьы ик удмурт-ӟуч карыса мынӥ. Таӵе амалэн ужаса, берыктон уж трослы каньылгес луиз. Со сяна, кузь ӟуч шуосъёс (предложениос) ӵем дыръя удмурт кылын куиньмослы (1/3) вакчигес луо вал – данъяськымон!

Валамон ини, выль кылдытэм кылъёслы дышыны кулэ, но тросэз-а асьмос, огшоры юзчиос — 🙂 (пайдаяськисьёс), умой тодӥськомы, мар со аккаунт, профайл, валидация, верификация, учётная запись гинэ но…

Пыронним, кужымъян, тодмос (тэг) но мк.с.в. кылъёсты, нырысь адӟыса гинэ но, капчигес валаны, нош контекстын соос эшшо но валамонгес луо. Со сяна, 21 тулыспалэ выль кылъёсын кылсузьет дась луоз ни шуыса, кыл сётӥзы. Котьмар ке но, огез тужгес но лякыт сюрес – зӥбылыса утчан амал, яке «метод тыка» шуиськомы сое.

Озьыен, – АЗЬЛАНЬ!!!

С. Максимов

http://vkontakte.ru/id96978289


Сергей Максимов — КонтактЫн удмурт кылын: 4 комментария

  1. гожъя валамон современной удмурт кылын, а то достали уже дугдылонниос, чошулонниос, сиськылонниос, а закодэз кызьы меда шуо виль сямен (зуч шуэ туалет), А?

Добавить комментарий

Ваш e-mail не будет опубликован. Обязательные поля помечены *