Уломы кырӟаса яке тӥяськем струна

Кык толэзь азьло яратоно гитараелэн нырысетӥ струнаез чигыны шедьтӥз.. Уг вера ни кызьы со вал, кин тӥяз но малы — соиз воксё но мултэс. Со умойтэм нуналысен, гитарае шкафын аслаз чехолэз пушкын ужтэк кыллиз, оло нош воксё вунэтысал ни со сярысь но дырын-дырын сюлэмлэн кырзамез потэ. Соку берпум дыръёсы потталляй гитараме но вить струнаосын кыче ке но аккордъёс но поттылын курадӟи, кырӟалляй, мар но со пӧрмылӥз ик но туж умойтэм, ӧлексы кадь. Нош одӥг шудо нуналэ ӧй чида но, мынӥ крезьгуро магазинэ, басьтӥ азвесь струнаос. Шумпотыса пертчылӥ гитараысьтым вуж струнаоссэ, пӧсяса но чик шокатэк кадь кыскытъяй выльёссэ — нырысетӥ уж котьку но сюлмаськытэ но шоканэз пытса. Кӧня ке дыр ортчыса мынам киям вал яратоно гитарае азвесь чилясь струнаосын. Котькуд струназэ кызьы кулэ кыскытэм берам, шуди яратоно кырӟанъёсме, кудъёсыз мынам сюлмысь пӧрмо.. Удмуртъёсыз соос пӧлын ӧвӧл ке но, ойдо ӵок… Ачим струнаосыз кыскаса сюлмысь кыӵе ке кырӟанэз нёжъяны. Эшшо но умой, нёжъямме кин ке кылэ ке, ӟеч кылъёс ке вера. Табере гинэ мон валай, мар мынам сыномем лулылы сыӵе уг тырмы вылэм — кырӟан.. Крезьгур, кудӥз потэ аслад чиньыосысьтыд, кырӟан, кудӥз потэ аслад сюлмысьтыд, куара, кудиз потэ аслад лул пушкысьтыд — тӥни мар уг тырмы вылэм буйгасьтэм улонам. Коня ке нёжъяме бере, сюлмы буйгаз..

Добавить комментарий

Ваш e-mail не будет опубликован. Обязательные поля помечены *