Нош вань-а удмурт интернет?

(Та статьялэн вакчияк берыктэмез )

  • Кыӵе ужъёс лэсьтын кулэ на вотэсын удмурт кыллэсь кулэлыксэ будэтон понна?

Тужгес но тодмо арбериосты удмурт кылэ берыктоно. Кылсярысь, ВКонтакте сайтлэсь интерфейссэ берыктоно но ваньмызлы возьматоно, Россиысь пичи калыкъёс пӧлысь удмуртъёс ВКонтактеез нырысетӥос пӧлын берыктӥзы шуыса. Возьматоно сое ВКонтактеысь 100 миллион пыриськисьлы (туж бадӟым лыд) — со удмуртъёслы бадӟым дан но гажан сётоз. Та ваньмыз лэсьтӥське ни но али дыре ВКонтакте 81%-лы удмурт кылэ берыктэмын. Эшшо кык толэзь, но асьмеос вормом.

Официальной терминологической комиссияослэсь ужзэз уг дунъяськы – асьмеос web 2.0 даурын улӥськом, куке кылъёсыз кылдытын кулэ сыӵе адямиос, кудъёсызлы со кылъёс кулэ, но соос туж умой валало со кылъёслэсь мар возьматэмзэс. Компьютер но вотэс кылъёсты удмурт кылэ ваньмызлэсь умой берыктозы вотэсын улӥсь удмурт егитъёс – соин ик ми али выриськом. Кылсярысь, берпуметӥ удмурт-ӟуч кыллюкамысь утчасько вал кызьы мед-а логин но пароль кылъёсты удмурт кылэ берыктӥллям шуыса – ӧй паймы: соосыз берыктӥллям ӵапак ӟуч сямен ик – логин но пароль. Нош web 2.0 удмурт егитъёс та кылъёсты тазьы берыктӥллям: логин – пыроннним, пароль – лушкемкыл. Усто-а? Усто!

  • Кызьы егитъёслэсь удмурт вотэсэн тунсыкъясконзэс будэтоно но сое азьланьтон борды кысконо?

Удмуртъёс сярысь блогъёсын, социальной вотэсъёсын, форумъёсын гожъяно, сӥё-дано удмурт учыръёс сярысь эшъёслы, ӵош дышетскись но ужась адямиослы мадёно (вотэсысь гожъямъёсы чӧлскыса – мед дышозы удмурт сайтъёсы ветлын) но ваньзэ тае йӧназ лэсьтоно. Кылсярысь, ВКонтактеез удмурт кылэ берыктон сярысь ивор нунал куспын Удмуртиысь вань интернет-СМИосы шедиз но Яндекслэн иворъёсын агрегатораз сюриз. Озьыен, удмуртъёс сярысь вераськонъёс потӥзы, визьмо Яндекс-бот но сое валаз. Нош ваньзэ тае ӵемгес лэсьтоно, удмуртъёс шоры конкурентной сфераысь зэмос профессионалъёс шоры кадь мед учкозы шуыса, кудъёсыз ке со сяна удмурт кылын верасько.

  • Денис Сахарных историк удмурт кыллэн вотэсын азьланьскемезлы люкетӥсь кык арбериез висъяз:

— тросэз удмуртъёс анай кылзэс юн тодэмзылы уг оско;

— тросэз удмуртъёс анай кылзылэн луонлыкъёсызлы уг оско.

Та люкетӥсь арбериос социальной вотэсъёс кылдэм дырысен ышизы ини, кылсярысь ВКонтактеысь Удмуртлык но мукет удмурт туркымъёс  кылдэм дырысен. Социальной вотэсъёс эшъёськонэн, осконэн, капчи вераськонэн пыӵатэмын, соин ик удмурт кылэз юн тодӥсьтэм адямиос ик вунэто анай кылзэс ляб тодэмзэс – эшъёссылэсь адӟем карыса удмурт сямен вераськын йӧндыро. Ӵем дыръя удмурт кылэз ляб тодон удмурт кылын творчестволы но чик уг люкеты. Кылсярысь, социальной вотэсъёслы но удмурт туркымъёслы луыса, тросэзлы тодмо луиз кылбурчи Богдан Анфиногенов, кудӥз суро-пожо удмурт-ӟуч кылбуръёс гожъя – туж тунсыко пӧрме, калыклы кельше. Нош кин удмурт кыллэн луонлыкъёсызлы уг оскы вал, валаз, удмурт кыллэн вотэсын бадӟым вуоноез шуыса. Удмурт луыны стильно но модно луэ.

Добавить комментарий

Ваш адрес email не будет опубликован. Обязательные поля помечены *

Этот сайт использует Akismet для борьбы со спамом. Узнайте, как обрабатываются ваши данные комментариев.