Анайлэн нуналыз яке Нырысьсэ семьяен телевидениын

Анайлэн нуналыз ортчиз ни ке но (пусйиське котькуд шуркынмонлэн берпуметӥ кӧснуналаз), кык кыл со сярысь мон гожто ик. Ӧй гожтысал дыр, мактаськон видеое ке ки улам ӧй луысал 🙂

Нош пӧрмиз ваньмыз озьы: кылем арняе Мынам Удмуртие ТРКысь жингыртӥз Вероника Ваулина но востэмгес куараен ӵектӥз Малы ке шуоно передачае съёмкае лыктыны, малпаз дыр лэся куронэзлы пумит луо шуыса: одӥгнам гинэ лыктоно ӧвӧл ук — семьяен, кудаз али дыре пыре мынам вуоно Кузпалы но солэн кӧтаз будӥсь нылы. Нош мон пумит ӧй луы — кизилияськын мед гинэ ӧтёзы, котьку дась. Наталие укыр ӧз пумитъяськы, нырысь кепыраз ке но.  Паймоды, дыр, мон таӵе конфиденциальной информациез кыре поттӥсько шуыса — анае воксё тэргаз, кылсярысь, син учкытозы шуыса — тӥляд, пе, сюанды но ӧз на ортчы, нылпиды но ӧз на вордӥськы. Мар шуод на, удмуртъёс ворсаськыса, кас усемлэсь кышкаса улыны дышемын. Нош ми симьяеным ваньмыз вылэ сялам но Мынам Удмуртиелэн студияз вамыштӥм — куазь соку туж урод кариськиз, тау соизлы, та телерадиокомпанилэн машинаосыз котьку сямен дыраз вуо но студие вортто но берен доре ваё, соиз туж умой. Йыр висён ӧжытгес.

Нуисьёс (Федор Миннигараев но Елена Слесарева) туж мур малпаськытӥсь но меӵак юанъёс сётъязы, кудъёсызлы кема малпаськытэк валэктонъёс сётъяно луиз. Наталиен пӧсяса ик пуким кадь. Ваньмыз ортчем бере одӥг лыктэм эшшо радиое интервью сётӥм на.

Съёмкаос бере ваньмыз ушъязы кадь (Федор Миннигараев, Елена Слесарева, Павел Поздеев, Руслан Нуриахметов): туж улэп но искренне пе вераським. Ну сойзэ асьтэос учкоды ни. Милемлы кельшиз кадь, астэ ящикысь учкын туж тумошо ке но 🙂

Вань анайёслы но вуоно анайёслы сӥзисько юн тазалык но ӟеч пиналъёс — соос асьмелэн сяськаосмы. Утелэ нылпистэс, кызьы утиды соосты, озьы ик пересьмон нуналъёсады соос но тӥледыз учкозы. Вот.

Мар со мон понна удмурт кыл

Мон — удмурт. Удмурт кыл — пуш дуннеелэн кык полэс узырлыкез, кык полэс эшъёсы, кык полэс дунне. Удмурт кыл мон понна — анай кыл, тужгес но матысез, лул но сюлэм пушкысь потӥсез. Та кылын гинэ мон быгатӥсько быдэсак пуш дуннеме усьтыны но матысь адямилы агай-вынлы сямен вазиськыны. Удмурт кыл — данъяськон: трос ӧвӧл дунне вылын интернетын чорыгъёс кадь уясь удмуртъёс — нош мон соос пӧлысь одӥгез. Со мыным сётэ эшшо одӥг нокинэн дышетэмты но сэрттымтэ-пертчымтэ ужан бусы, кудаз ужаса лэсьтӥськод нокинэн та дырозь лэсьтымтэ выль тунсыко усьтонъёс.

Тани эшшо одӥг мур малпан удмурт кыл сярысь http://kyshnomurt.ru/?p=11 .

 

Зумыто уж 2.0

Кылем гудырикошконлэн пумаз выльысен улӟиз Россиын но Украинаын тужгес но яратоно «Вконтакте» нимо мер вотэслэсь интерфейссэ удмурт кылэ берыктон уж. Табере «Вконтакте»-лэн эшшо одӥг нимыз луоз на – «Контактын». Али та вотэслэсь интерфейссэ удмурт кылэ сяна, бигере, поре но мукет кылъёсы берыкто. Та интерфейсэз берыктонэз мылкыдчиос 2008-тӥ арын гужемпал мытӥзы. Со берыктонлэн нырысетӥ тулкымез вал. Техник ласянь умоятэмъёслы тау каремен луонлык кылдӥз кыкетӥ берыктон тулкымын ужез ӝогомытыны. Табере котькуд адямилэн, кинлэн ӧтёнэз вань, ужрадэ пыриськемез луэ. Берыктон понна табере нокытчы но нимаз пыроно ӧвӧл, тупатонъёсты пыртыны луэ меӵак «Контактын» пукыку. Та ужрад тулкымъёсты ӵошатоно ке, вераны кулэ, кыкетӥ берыктонын уж шалтыргес азинске. «Контактынэз» берыктонлэн кивалтӥсез Роман Романов, Удмуртлык нимо «Контактын» туркымлэн кылдытӥсез, удмурт кылын вотэспроектъёслэн валтӥсез, таизлэсь ужрадлэсь ӝоглыксэ тазьы валэктэ: Читать далее

Удумрт Яндекс-виджет

Та учыр нош ик вырӟытӥз мынэсьтым чиньыосме та чырсаны кутскем нуналгожъямъёсам выль гожтэт гожтын.

Яндекс виджет проект сярысь мон гожъяй вал ни азьыл гожтэтъёсам. Нош али та аспӧртэмлыко арберилэн азинсконэз шӧдтэк шорысь потӥз. «Мынам Удмуртие» телерадиокомпанилэн удмурт иворъёсын чуреныз Яндекс виджет кызьы ке сюрем Ижкарлэн виджетъёсыныз списоказ. Бадӟым вормон! Пӧсь кичабонъёс «Мынам Удмуртиелэн» ӧнерчиосызлы.

Зэмзэ вераса, виджет лэсьтыны кулэ 1 минут дыр. Но татын дуно ачиз малпанэз, со одӥг минутъем уждэ сыӵе малпаса меӵак Яндекслы мычыны. Тодам ваи: та блогелэсь виджетсэ ӵектӥ вал Яндекслы — кулэ ӧз каре. Малпасько, мукет удмурт веб-мастеръёс адӟем карозы МУлэсь ӟеч ужзэ но асьсэ ужазы кутыса удмурт интернэтэз ӝутонын выль бадӟым вамыш лэсьтозы!

КАЗАКгуртысь KAZAKofSKY КАЗАКпи

8-тӥ толсуре 2006-тӥ арын Удмурт Дунне газетлэн быдэс бамез трос мон сярысь статья потӥз, пӧрасез — Елена Никитина. Удмурт Дуннелэн сайтэз соку ӧй вал на бере, сыӵе дуно статьяез аслам блогам интыяно кариськи. Ганяк кариське но лыдӟелэ.

ОдӤг пол интернетын бугыръяськыкум, удмурт кылын дасям сайт вылэ мырӟиськи. Соос сокем трос ӧвӧл бере (уг янгыша, дыр, туж ӧжыт шуи ке), нырысь- валысь синъёсы чылкак палёмизы. Ма, кин-о сайтсэ таӵе аспӧртэмлыко малпам: сьӧд буёло экран вылын тӧдьы букваос пото – та «укноез» кылдытӥсь озьы аслэсьтыз малпанъёссэ гожтэм, татчы ик интыям удмурт кылын кылбуръёссэ но. Сайтэз пыр-поч сӥсъяме бере тодӥ: сое дасям егит пи Эрик KAZAKofSKY.
Таӵе нимтулэз адӟыса, нош ик абдрай. Ма, кинӟо со сыӵе? Оло нош кунгож сьӧрысь адями? Озьы ке луысал, быгатысал шат со удмурт кылын кылбуръёс гожъяны?Оло нош кылэз ас мылкыд каремезъя дышетӥз…
Йырам чилектэм юанъёсын мон асме кема ӧй курадӟыты. Кутӥ но солы электрон гожтэт пӧрай. Трос-а ӧжыт-а дыр ортӟиз со бере, мон та пияшен пумиськи ик…

Читать далее

Удмуртлык vs. Удмуртлык, яке "Трос кыло улосын удмурт кылэз дышетон"

10 тулыспалэ 2010-тӥ арын Ижкарысь Удмурт кун Кузебай Герд нимо йӧскалык гимназиын ортчиз «Трос кыло улосын анай кылэз дышетон (Изучение родного языка в полиязычном пространстве)» 2-тӥ Калыккуспо конференция,  кудӥз радъямын вал Удмурт Элькунысь дышетон удысын ужасьёссэс тодон-валанъёссэс будэтонъя но паськытатонъя институтэн. Читать далее

Удмурт кылын QIP 2005

QIP 2005 ICQ клиентэз удмурт кылэ берыктон кык толэзь палан кыстиське ни, оло нош кемагес но. Али дыре текстъёс удмурт кылэ 74 % -лы берыктэмын. Озьы ке но, мон берыктэмлэсь пумзэ возьмаса ой кылльы, QIP-лэсь удмурт кылъёсын файлзэ донги QIP-лэн системае пуктэм папкаяз. Со понна мар кароно луиз: Читать далее

Романов Роман Александрович Удмурт Википедиын

Кыче трос учыръёс луо улонамы. Троссэ асьмеос дыр ортчыса тодамы но вайыны ум ни быгатиське, тодамы вайиськом ке но, учырлэсь дырзэ, ку ортчемзэ эшшо но шуггес луэ тодамы вайын. Трос дыръя мынэсьтым портэм интыосы курылизы автобиаорафияме, коня мон соосыз гожъяй, уг ни тодиськы. Нош али кылдиз малпанэ ачим сярысь удмурт сямен но википедие келяны. Туж умой ук, биографиед котькинлэн син азяз (эшшо ке утчаськон системаос википедиез туж гажало но статьяосты котькыче запросъя вылиегес жутыто), но котьку жогак биографиме тупатыны, выль учыръёс будэтыны луэ, мед луоз гинэ интернет но 5 минут палан дыр. Тани пораме: http://udm.wikipedia.org/wiki/Романов,_Роман_Александрович

Удмурт удмуртлы удмурт сямен

Мон удмурт. Кымесам гожтэмын, мон удмурт шуыса, удмуртлыке вирам анай йӧлын пыӵатэмын. Гадям мыжгасько: «Мон Удмурт!» Атае но удмурт, анае но удмурт. Атаелэн атаез но, анаез но удмуртъёс вылӥллям, анаелэн атаез но, анаез но удмуртъёс. Читать далее

Котьку мед улоз Яратон

Ӵем дыръя асьмеос, яратӥсьёс, ог-огогенымы каршиськом, ченгешиськом. Малы? Мон малпамъя, асьмеос ӵем дыръя ум быгатӥське сюлэммес усьтыса пӧзись кылъёсмес, шӧдонъёсмес но яратоно адямиемылэсь возьманъёссэ шараяны, ум валаське ог-огмес. Со бордысен яратон тэшканы кутске. Кылдо валантэмъёс, кудъёсыз ӝоген быгато яратонэз тӥяны. Соин ик пичи ке но валантэмъёс кылдо ке, малпасько, соку ик вань йыркурез вунэтыса вераськоно, лулэз но сюлэмез гажанэдлы шараяно. Соку ваньмыз ортчоз капчиен, яратон пуксёз ас интыяз. Мон озьы малпасько. Яратӥсько 🙂 Читать далее