Та нуналэ (29 коньывуонэ) уж доры ӝыны часлы вазьгес вуоно луиз. Толоназ кыдёкы уйшор берозь пуки ке но, котьку сямен ик ваньзэ ужме быдэстыса ӧй вутты: кылиз ӵукналы. Принтер пыр поттӥ курсэз кылзӥсьёслы раздаткаос но ужан тетрадь. Нунал бырытозь валай, раздаткаые будэтыны кулэ на вылэм интернетысь адресъёс, кытын утчаськон оптимизация (SEO, вакчияк вераса, search engine optimization, англ. — оптимизация под поисковые системы) котьку но умой юрттэт сётозы. Ойдо, ӵок ни а мара соиз..

Уйин, та секыт нунал азьын, изьытэк потӥ — сюлмаськи вылды. Сюлэмме шуг каре на вал интерактивной доскаен ноку но ужамтэе. Но нокыӵе кышкытэз вылымтэ, мон соин вырын 1 минут куспын дыши. Ку ке вань дышетскисьёс (тросэз кудъёсыз пӧысь вал информатикаен дышетӥсьёс, но вал на психолог но) люкаськизы, мон верай соослы нимтулме. Соку ик сюлмам паника каръяськиз: «Мар мон каром таосын быдэс нунал??? Тырмоз-а материалэ но тодон-валанъёсы???» Но соку ик ӝот-ӝот чурыт кариськи но кутски лыдӟын лекцияме . Кӧня ке дыр ортчыса, мон та ужлэсь кайф гинэ на басьтӥсько вал. Ваньмыз кошкиз ву вылтӥ кадь. Удмурт Элькунысь дышетон удысын тодон валанзэс будэтонъя но паськытатонъя инстутутамы трос гинэ выль техника басьтэмын: мобильный компьютер класс — пичи гинэ уробо, кудаз радэн-радэн тыриськон ноутбукъёс. Со уробо бордын ик вань на Wi-Fi точкаез, кудӥныз радъян луэ локальной вотэс но интернетэ потон. Нош валтӥсь компьютерлэн (курсэз лыдӟисьлэн) ноутбукысьтыз сульдерзэ интерактивной доскае поттыны луэ — ваньзылы адӟымон. Самой сыӵе ик амалэн ужамы интернет но вотэс пыр.
Дышетскисьёсылы нуназеозь мон лыдӟыса быдтӥ курсэлэсь теориязэ, собере ик валай, мынам кылы воксё някрак луиз кадь — ноку но сомында час чик дугдылытэк вераськеме ой на вал дыр. Нуназеяммы бере басьтӥським практика борды. Кылзӥсьёслы сётэмын вал уж Joomla сайтазы выль контент лэсьтыны, кудӥз ке гожтӥське нимысьтыз правилоосъя. Та амалан ключевой кылъёсыз быръён понна кутэмын вал яндекслэн ключевой кылъесъя статистикаез. Ваньзы ик кылзӥсьёсы ужзэс валазы но быдэстӥзы.
Нош мон ачим понна шумпотыса улӥ, нырысетӥ дышетскисьёсылэсь синъёссэз ӝуатыны быгатӥ шуыса. Табере мон валан кутскисько, малы дышетӥсьёс сыӵе ярато асьсэлэсь ужзэс. Ӝоген гожяъло выль курсъёслы программа но дышето мукет дышетӥсьёсты. Матысь дыре вань малпан басьтӥськыны «Интернет. Нырысетӥ вамышъёс» курс борды. Кинлы тунсыко, гожтӥськелэ.