Туала удмурт блогинг сярысь 5 коньы

pukychКылзӥ ай туннэ Удмурт блогъёс сярысь передачаез.

Жаляса верано, туннэ нуналлы тужгес но продуктив блоггеръёс уггес валало мар со сыӵе блог но кыӵе солэн функциосыз. Учкемзыя, блог со «кытчы ветлӥ но мае адӟи» малпанъёс.

Котькуд ужлэн вань аслаз ужпумез (целез), кудзэ кыӵе ке шӧдскымон арбериосын (цифраосын) лыдъян луэ. Озьы ик блог кутскыку но, сыӵе ужпумъёс йырад ке но гожтэмын мед лоузы. Эшшо но умойгес, соос ваньмызлы адӟиськымон шараямын ке — со туж ӟеч кыдатэ (дисциплинировать каре) но кылкутонлы дышетэ. Ужпумъёс пуктэмын ке, «малы тон блог нуиськод?» но «малы со тыныд кулэ?» юанъёс асьсэос ышо.

Кыӵе блоглэн функциосыз?

(ваньзэ уг гожтӥськы, аслым кулэ радлыкезъя гожтӥсько, ӟуч блогме но лыдэ басьтыса)

  • Самопрезентация. Котькуд адямилэн ассэ чебергес, йӧногес но визьмогес каремез потэ.
  • Вузаськон. Та тема тӥледлы уз кельшы, удмуртъёс уг ярато вузаськисьёсты. Но мар карод, аслыд ӟеч ӧнерчилы кадь самопрезентация лэсьтиськод ке, автоматически тыныд ужъёсыд понна коньдон ӵектыны кутско.
  • Психотерапия. Радызъя гожъяськон малпанъёссыз радъяны юрттэ, сюлэмшугъёсты но лулэз йӧнатэ.
  • Шудон. Кин ке но Xbox-эн шудэ, нош блоггер шудэ клавиатураен но лыдӟисьёсыныз.
  • Азинскон, пуш гудӥськон. Нуналысь-нуналэ гожъяськыса, ас пушкад но калык пушкын гудӥськыса, азинскиськод, визьмомгес луиськод, выль малпанъёсы вуиськод.

Та функциосын ӵошатыса цель пуктымтэ блоггеръёс валалозы дыр, малы соосты сыӵе кыске гожъяськыны )

Тематикая блогъёс сярысь

Ачид сярысь но пӧртэм ужрадъёс сярысь гожъяськод ке со умой, но пӧртэм тематикая блогъёс блогинглэн азинсконэзлэн вылӥгес пагӟатэз луо, малы ке шуоно сюбег темаос сярысь тросгес вераськиськод ке, соосъя ӟечгес ӧнерчи луоно.

2005-тӥ арын мон лэсьтӥ вал аслым нырысетӥзэ асбамме, соку блог сярысь уг на тодӥськы вал. Соку мынам потэ вал, вотэсын удмурт текстъёс тросгес мед луозы шуыса. Собере мынам потӥз тодэме, кӧня адями мед-а пыра шуыса — пуктӥ счётчик. 2-3 пырало вал кадь арня куспын. Удмурт сайтъёс нокинлы кулэ ӧй вал кадь. Юан кылдэ вал, вань мед-а удмуртъёс интернетын?

Собере мынам потӥз мыным мед гожъялозы шуыса — пуктӥ куно книга (соку со туж модно вал). Потӥзы нырысетӥ таукаронъёс но огшоры гожъямъёс. Со дырысен мон тодматски Петров вынъёсын, Миннигараев Федяен, Сахарных Денисэн, Даралиен но трос мукетъёсыныз. Тодӥсько ай, Дарали гожтӥз вал: «Тон дыр тужгес но крутоез удмурт, нош мон тужгес но крутоез удмуртка 🙂 «. Собере потӥз контакт но Удмуртлык. Удмуртъёс интернетын трос вылэм, шедьтыны гинэ соосын секыт вал. 

2009-тӥ арын удмурт блогъёс сярысь малпаськын кутски. Тросгес карем потэ вал соосты. Кутски ачим бордысен. Но соку лыдӟисьёсты ӧй шедьты. Удмурт блоггингъя тулкым кисьмаз бергес, кӧня ке аръёс ортчыса.

Али веран луэ, удмурт блогосфера вань шуыса. Табере адӟем потэ сюбег темая удмурт блогъёсты: визьмо пелепонъёслы разработка (Шулаков но Гриша Григорьев, ау?), компьютер суредаськон (Сидров но Бикузин, ау?), видеомонтаж (Корнилов но Влад Степанов, ау?), фотография (Чимали, ау?), кино лэсьтон (Палган, ау?), горд сюен вырон (Вера Степанова, ау?), интернет-реклама (Петр Смирнов, ау), бизнес-процесс автоматизаци (Виталий Пронин, ау?), бизнес (Семён Семёнов, ау?), удмуртлык (Андрей Краснов но Валерий Ложкин, ау?), юриспруденция (Евсеев, ау?), но трос мукет ӧнерчиос, кытын тӥ? Дарали авангардын, модалиос сярысь гожъя кадь. Та блогез но сюбег тематикалы сӥземын шуын луэ.

Вакчияк вераса

Таӵе трос кылъёсын верам потэ, эн ӝожоме, гожъяны кутскемды бертӥ ик тӥледыз уз лыдӟе шуыса. Учконо ке, удмуртлыкын предложение гинэ сётэ спрос. Маке тунсыкозэ лэсьтӥды ке, со аслэсьтыз аудиторизэ кема-а, ӧжыт-а дыр ӵоже одно ик шедьтоз. Аслад яратоно ӧнеред сярысь аслад анай кылыныд гожъяны со зэмзэ но туж меӵкыт: психотерапия, шудон но азинскон. Удалтӥз ке, оло, коньдон но сётоз )

Туала удмурт блогинг сярысь 5 коньы: 1 комментарий

  1. Сюбег тематикаё блогъёс ласянь туж шонер комментариед. Тини Семён Семенов блогалля, нош малы ке удмурт сямен туж шер гожъя, чемгес гожтысал ке, удмурт аудиторилы гожъямъёсыз трос поллы тунсыкогес луысалзы, соку коня ке улыса, оло, выль ужбергатисьёс но сценае потысалзы.

Добавить комментарий

Ваш адрес email не будет опубликован. Обязательные поля помечены *

Этот сайт использует Akismet для борьбы со спамом. Узнайте, как обрабатываются ваши данные комментариев.