1024, Огырӟи-Глазкар яке бигер-ӟуч сюан

Кылдоз вылэм та югыт дуннеын сюанын адӟись но луын. Мар шуонэз, сузэр-апайёсылэн сюаназы котьку вожъяськыса учкыли учкисьёс шоры — кыӵе соос чебересь но йоноесь, пуко сюанысь нырысетӥ егитъёс вӧзын — выль кен но эмеспиен артэ. Шумоптӥсько табере, мыным но сыӵе сӥ но дан усиз шуыса. Табере мон шоры озьы учкизы, дыр: кыӵе удалтэм та пияшлы, сыӵе интые сое бырйиллям ке, трос мукетъёсыз пӧлысь. Тазьы малпаськыса гинэ валаськод, кыӵе бадӟым отвестсвенность басьто адӟисьёс сюанын, соин ик соос сюанын кыкетӥ адямиос, соин ик соосыз, одно ик соосыз бырйизы эшъёссы, выль кен но эмеспи, асьсэлы адӟисе…Нырысь кылдӥз Огырӟи карын шулдыръяськыны. Мыло-кыдо пумитазы милемыз бигер агайёс но апайёс Огырӟи карлэн одӥгаз сиськоннияз. Тужгес но паймытӥз сюанын бигеръёслэн ӧжыт вина юэмзы.. Кыкетӥ нуналаз вазь ӵукна ик шонтӥмы Глазкаре — кык но ӝыны час но ми лымшорысь уйпала вуим ни. FM-приёмникын 102,4 тулкым, нош дыр возьматэ 10:24. Номыр паймымонэз ӧвӧл кадь но, мыным, ӧнерчилы сямен, со пыраклы син азям кылиз. Зэмзэ верано ке, Глазов музъемын мон ноку но ӧй вал на. Вермзэс тодӥсько, глаз палан удмуртъёс воксё быремын ни шуыса но ноку ик но отын ой вал шуыса. Нош тодӥсь адямиос воксё абдратӥзы — Глаз ёросын, пе, ог 50% удмуртъёс вань улӥсьёс пӧлысь. Но озьы ке но, туж ӧжытэз вераське на анай кылыныз, нош перепись луиз ке, асьсэзыз нималозы дыр ӟучен.. Малы озьы? Малы Алнаш ёросын удмуртлык улэп но малы Глаз палан чик уг йӧнъясько удмуртъёс?
Глазкаре вуэм бере ортчытизы кызьы ӟуч сямен шуо «выкуп» — выль кенэз басьтон. Трос «курадӟонъёс» пыр потоно луиз эмеспилы но адӟисьлы (мыным), выль кен доры сое лэзьытозь. Нырысь ик куризы конфет, кудӥз ке милям сьӧрамы ӧй вал — бинялтоно луиз кагаз коньдонэ корт манетъёсты. Собере эктоно луиз на присядкаен эктон, корт коньдонэн тырмытыны стаканэз, гозыез юн думылыны но эмеспилы ик сое пертчыны, выль кенэз трос шуныт-небыт кылъёсын вераны, нуал пусъя тужгес но важной датаосты тодэ вайыны, трос нылашъёслэн ымдур пытьыоссыя тодманы выль кенлэсь ымдурызлэсь пужызэ но трос мукет..
Собере ЗАГС-ын ортчиз регистрация — гожтӥзы кагаз, кудаз выль кенэн эмеспи кинюртэмзэс пуктӥзы, соос кышноен картъёс луыны соглаш шуыса. Зундэсъёссэс чиньыосазы тырыкузы ваньмызлэн сямен куноослэн синъёсысьтызы быльырало синкылиос, мынам сямен ик. Шумпотӥсько, ЗАГС котькытын сямен ужзэ умой быдэстэ, регистрациысь кӧня ке минутъёс егитъёслэн син азязы весяклы мед кылёз шуыса. Тау соослы.
Сизьым выж ортчыку быдэсак сюан кортеж дугдылӥз Иднакарлэн бервылаз, егитъёслэн тазалыксы понна юиз шампанской. Сизьыметӥ выж быръемын вал глаз палась тужгес но кузез, эмеспилы выль кенэз ки вылаз ӝутыса ӧжыт ке но курадӟоно мед луоз шуыса. Но эмеспилэн ваньмыз пӧрмиз. Кызьы пе ай сотэк, ку ке тынэсьтыд котькуд выростэ фотоаппаратъёс но видеокамера гожъяло….
Нош собере кутскиз зэмос ӟуч сюан, вань аслаз паськыт лулыныз, трос сиён-юонэн но кык нуналэ шулдыръяськонэн. Туж бадӟым тау ваньмызлы, кин кузьмаз капчи мылкыд.

Добавить комментарий

Ваш адрес email не будет опубликован. Обязательные поля помечены *

Этот сайт использует Akismet для борьбы со спамом. Узнайте, как обрабатываются ваши данные комментариев.